Kulturminneforvaltning - bachelorstudium

Kulturminneforvaltning er eit tverrfaglig studium der du lærer om forvaltning og formidling av fortida. Dette inkluderer både materielle og immaterielle kulturminne. Kulturminna blir studert i kontekst til menneske, samfunn og miljø.
På dette studiet har du ein variert studiekvardag som inkluderer ekskursjonar, studiebesøk og praktisk feltarbeid med realistiske prosjektoppgåver. Også fire veker hospitering ved relevant arbeidsplass inngår.
Utdanninga gjer deg kvalifisert til å jobbe i museum, offentlig forvaltning (kommune, fylke og stat), organisasjonar og bedrifter relatert til kulturminne.
NTNU er den einaste lærestaden i landet som tilbyr ei slik tverrfaglig utdanning retta mot forvaltning og formidling av kulturminne. 

Kulturminne er både reint fysiske spor frå nær og fjern fortid og det meir immaterielle som kunnskapar og ferdigheiter, skikkar og tradisjonar. Studiet har fokus på både dei materielle og dei immaterielle sidene av kulturarven: på bygningar og handverksferdigheiter, på minnestader og tradisjonar og på kulturlandskap og bruksmåtar.

Bachelorprogrammet i kulturminneforvaltning er profesjonsretta og har tette band til praksisfeltet. Du finn tidligare studentar i jobb både ved museum, i offentlig forvaltning, i kulturvernorganisasjonar og i bedrifter som driv med antikvarisk handverk.