Engelsk 2 | 5.-10. trinn | nettbasert | Kompetanse for kvalitet

Kvifor studere engelsk?

Med denne vidareutdanninga i engelsk får du djupare innsikt i språkopplæring, fagkunnskap og fagdidaktikk på mellom- og ungdomstrinnet. Du får òg høve til å vidareutvikle dine eigne språkferdigheiter og tekstkompetanse. Studiet Engelsk 2 bygger vidare på Engelsk 1.

Kva lærer du?

• Du får betre innsikt i språkopplæring, fagkunnskap og fagdidaktikk på mellom- og ungdomstrinnet.
• Studiet omfattar vidareutvikling av språkferdigheiter og tekstkompetanse og gjev ei innføring i eit rikt og variert utval av tekstar – både til personleg og fagleg vekst og til bruk i undervisning på mellom- og ungdomstrinnet.
• Du oppnår djupare kunnskap om den grammatiske og fonologiske strukturen i det engelske språket.
• Studiet legg vekt på kva som kjenneteiknar elevar på ulike trinn og deira språkutvikling.
• Du lærer òg om tema som kommunikasjon, språkleg og kulturelt mangfald, vurdering og utvikling av digitale ferdigheiter i engelskfaget.

Målgruppe

Lærarar som underviser i engelsk og som ønsker personleg og fagleg vekst til bruk i undervisning.

Praktisk informasjon

Undervisningsform

Studiet er nettbasert og har undervisning ein gong i veka, torsdagar 13.30-15.30. All undervisning er på engelsk.

Nettundervisninga består av forelesningar, presentasjonar, seminar og gruppeinndelte økter. Undervisninga kan vere både synkron og asynkron.

Me nyttar læringsplattforma Canvas og konferanseverktøyet Zoom til kommunikasjon med studentane.Du vil få tilgang til Canvas med meir informasjon før studiestart.

Praktisk erfaring frå yrket ditt vert trekt inn i emnet, og det er eit mål at du skal tilføre skulen du underviser på, oppdatert fagleg og didaktisk kompetanse.

I studiet inngår tilbod om ei vekes tur til Det norske studiesenteret i York. Turen er ein del av undervisninga i emne 2 om våren, men er ikkje obligatorisk. Du må sjølv dekkje reiseutgifter, opphald og kursavgift. Dersom du ikkje kan delta, får du tilbod om eit alternativt opplegg. Sjå: https://www.york.ac.uk/nsc/short-courses/

Du finn meir informasjon om innhaldet i studiet i emneplanane:

• ENU803N Engelsk 2, emne 1 - Kommunikasjon i språk, tekst og kultur
• ENU804N Engelsk 2, emne 2 - Mangfald i språk, tekst og kultur

Nettøkter

HØST 2025,
Nettundervisning på torsdagar kl. 13.30–15.30.
Første forelesning 21.08.2025

Tilrådd forkunnskap

Du må vere tilsett i ei lærarstilling. Studiet Engelsk 2 bygger på Engelsk 1. Studiet har to emne, kvart på 15 studiepoeng, som byggjer på kvarandre. Emne 1 vert undervist i haustsemesteret og emne 2 i vårsemesteret.

Pensum

Pensumlista for haustsemesteret vert publisert på hvl.no 1. juli.

Eksamensform

• Emne 1: Heimeeksamen, to deler 1 veke for kvar del
• Emne 2: Munnleg eksamen, 30 min

Stipendordning for lærarar i skulen

Jobbar du i skulen, kan du søkje om vikar- eller stipendordning gjennom Utdanningsdirektoratet. Søknadsperioden er frå 1. februar til 1. mars. Les meir om tilretteleggingsmidlar, vikar- og stipendordning frå Utdanningsdirektoratet på udir.no

Du må sende to søknader i 2025:
Ein søknad til Utdanningsdirektoratet for finansiering, frist 1. mars.
Ein søknad til HVL for opptak på vidareutdanningstilboda våre, frist 15. april.
Søkjarar som har fått innvilga frikjøpsordning frå Udir, blir prioriterte i opptaket.